អាមេរិក៖ ផលិតកម្មយក្ស SONY Entertainment នៅថ្ងៃទី១២ ខែសីហាម្សិលមិញនេះ បានប្រកាសពីការបន្តពន្យារពេលនៃការចាក់បញ្ចាំងខ្សែភាពយន្តថ្មីរបស់ខ្លួនគឺ Venom : Let There Be Carnage រយៈពេលជាង ១ខែបន្ថែមទៀត ពោលគឺខ្សែភាពយន្តនេះនឹងចាក់បញ្ចាំងនៅកំឡុងពាក់កណ្តាលខែតុលាខាងមុខវិញ បន្ទាប់ពីសហរដ្ឋអាមេរិកកំពុងរងគ្រោះដោយការវាយប្រហាររលកថ្មីនៃវីរុសកូវីដ-១៩។
ផលិតកម្ម SONY Picture បានបញ្ជាក់ថា ខ្សែភាពយន្តភាគថ្មី Venom : Let There Be Carnage ដែលសម្តែងដោយតារាប្រុសជនជាតិអង់់គ្លេស Tom Hardy នឹងត្រូវលើកពេលពីថ្ងៃទី២៤ ខែកញ្ញា ដោយដាក់បញ្ចាំងចាប់ពីថ្ងៃទី១៥ ខែតុលាខាងមុខវិញ។
មិនមែនមានតែ Sony មួយទេដែលប៉ះពាល់កាលវិភាគបញ្ចេញខ្សែភាពយន្ត ដើម្បីកើបចំណូលពីទីផ្សារភាពយន្តនោះ ពោលគឺផលិតកម្មជាច្រើននៃហូលីវូដក៏ជួបប្រទះបញ្ហាដូចគ្នានេះដែរ ខណៈគេរំពឹងថា ភាពយន្តដែលត្រូវជាប់គាំងនោះ នឹងចាប់ផ្តើមបញ្ចេញលើទីផ្សារបាននារដូវស្លឹកឈើជ្រុះ ឆ្នាំ២០២១នេះ។ សុវត្ថិភាពរបស់អ្នកទស្សនាក្នុងរោងកុន នៅមិនទាន់អាចធានាបាននៅឡើយនាពេលបច្ចុប្បន្ននេះ ខណៈដែលវីរុសកូវីដ-១៩ ប្រភេទថ្មីជាច្រើន កំពុងបន្តរាតត្បាតនៅជុំវិញពិភពលោក។
គួររំឮកថា ភាគទី១ នៃខ្សែភាពយន្ត Venom នេះ ទទួលបានជោគជ័យយ៉ាងខ្លាំងកាលពីឆ្នាំ២០១៨ ដោយកើបប្រាក់ចំណូលបានជាង ៨៥០លានដុល្លារពីគ្រប់រោងភាពយន្ត ហើយ Sony ក៏បានផលិតភាពយន្តភាគបន្តនេះ ដែលនឹងចាក់បញ្ចាំងឆាប់ៗនាពេលខាងមុខ៕